Ipinaalala ng Department of Health (DOH) ang kahalagahan ng pagsunod sa minimum health standards bilang susi sa hindi na pagkalat pa ng coronavirus disease (COVID-19) sa Pilipinas.
Pahayag ito ng DOH matapos sabihin ng mga eksperto mula sa UP Octa Research group na posibleng “ma-flatten na ang curve” ng pandemic sa bansa, sa pagtatapos ng Agosto o sa Setyembre.
“Ito po ay projections lamang at naka base po ito sa iba’t ibang factors at
assumptions.”
“Importante pa rin po na alalahanin at tandaan na habang wala pang vaccine o gamot sa COVID-19, kailangan po natin mag practice ng minimum health standards tulad ng tamang pagsuot ng mask, laging maghugas ng kamay or magsanitize, umiwas sa mataong lugar o social distancing, manatili sa bahay o lumabas lamang kung importante.”
Sa nakalipas ng halos walong buwan na pagharap ng estado sa pandemic, marami na rin daw nagawa ang gobyerno para respondehan ang sitwasyon.
Ang mga bagong kaalaman umano tungkol sa virus ang nagsilbing gabay para makabuo ng polisya ang mga otoridad sa contact tracing, referral ng confirmed patients, isolation facilties at hiring ng health care workers.
Naniniwala ang DOH na maaaring magbago ang sitwasyon depende sa tugon at pagsunod ng publiko sa rekomendasyon ng mga eksperto.
“However, this situation can reverse if we do not consistently practice the health standards. Maari ka pa rin mahawa o bumalik ang virus kahit na posibleng mag flatten ang curve as predicted by the UP Octa Research Group.”
“Ang isang ehemplo ay ang New Zealand. Madali nilang nasugpo ang paglaganap ng COVID-19 ngunit pagdating ng 103 days na virus free sila, may mga bagong kaso silang natagpuan.”
Ayon kay Dr. Guido David ng research group, kung nanatili ang modified enhanced community quarantine sa Metro Manila at apat na kalapit lalawigan ay magreresulta ito ng pagbagal sa pagkalat ng sakit kasabay ng pagtatapos ng Agosto.
Dagdag pa ng eksperto, kahit naman bumagal o nag-flat na ang curve ay aabutin pa rin ng hanggang dalawang buwan para maabot ang “very manageable level” ng COVID-19 cases.
