KALIBO, Aklan — Nagpalabas ng pastoral letter ang Diocese of Kalibo laban sa korapsyon na binasa sa lahat ng parokya at kapilya nito ngayong araw ng Linggo.
Ayon kay Fr. Justy More, chancellor ng St. John The Baptist Cathedral sa halip na mag-organisa ng rally bilang pakikiisa sa Trillion Peso March ngayong araw ng Linggo, Nobyembre 30 ay nagpalabas na lamang sila ng pastoral letter na babasahin sa bawat misa sa lahat ng mga simbahan bilang pagdadasal para sa transparency, accountability, hustisya at restitution sa gitna ng patuloy na isyu ng katiwalian sa bansa.
Ang sanib-pwersa na pagkilos aniya ay hindi lamang pagtindig laban sa korapsyon, kundi isang panawagang moral para sa katarungan at integridad sa pamumuno ng bansa.
Kabilang sa tatlong nangungunang panawagan sa pastoral letter ay ang pagbunyag sa mga criminal; pagbalik ng pera ng bansa; pagkulong sa mga kurakot; at pangingibabaw ng mamamayang Pilipino.
Kasama rin dito ang panawagan na mabigyang boses ang reklamo ng publiko at isulong sa mga nasa pwesto ang pagsasagawa ng malinaw, mabilis at makatarungang imbestigasyon sa katiwalian sa pondo ng bansa.
Binigyan diin nito na ang pagkampi sa katotohanan ng Simbahan ay hindi pagiging politikal, sa halip ay lubos na pagbibigay buhay sa Ebanghelyo, lalo na para sa mga mahihirap at ordinaryong mamamayan na pinakaapektado ng korapsyon.
Panahon rin aniya ito ng panawagan dahil ang pastoral letter ay ibinatay sa readings para ngayong araw ng first Sunday of advent.
