Hindi pinansin ng tatlong reconnaissance ship ng Chinese Navy ang ibinigay na warning ng Philippine Navy Monitoring Stations matapos mamataan ang mga ito sa may bahagi ng Sibutu at Balabac straits, dalawang linggo na ang nakakalipas.
Ito ang kinumpirma sa Bombo Radyo ni Defense Sec. Delfin Lorenzana na nadismaya sa hindi pag-abiso ang China na may barko silang dadaan muli sa karagatan ng Pilipinas.
Bukod dito, pinatay na naman daw ng Chinese vessel ang kanilang Automatic Identification System (AIS).
“Nope. They did not inform us nor responded to challenges from our naval monitoring stations. They also shut their automatic identification system (AIS).”
Ipinunto ng kalihim ang ginagawa ng ibang mga warships na dumadaan sa lugar dahil nagpapasingtabi o bumubusina daw ang mga ito.
Pero tanging mga Chinese lang daw ang hindi kumikilala sa international protocol kapag dumadaan sa Philippine territory.
Giit pa ni Lorenzana, walang epekto ang naging pahayag ni Chinese Ambassador Zhao Jianhua na agad nila ipapaalam sa Pilipinas kapag may Chinese vessel na dadaan sa teritoryo ng bansa.
“Oo. Parang kanila na yung Sibutu at Balabac straits. All other warships we are informed of their passing. Only the Chinese refuse to conform to Internationally accepted norms by ignoring them. This despite the Chinese Ambassador’s word that henceforth he would ask the PLA Navy to inform their Embassy in the Phil who will in turn inform is of any passing PLAN warships passing thru our territorial waters,” ani Lorenzana.
“That was after the 4 instances of PLAN warships transiting thru sibutu earlier and before the survey ships were sighted. Hence, wa epek yung sinabi ni Ambassador Zhao na they will inform us in advance,” dagdag ni Lorenzana.
Una nang tinukoy ni Western Mindanao Command commander Lt. Gen. Cirilito Sobejana na tatlong Reconnaissance ship ng Chinese Navy ang muling namonitor sa teritoryo ng bansa.
Ito na ang pangalawang insidente na namataan sa Sibutu at Balabac Straits ang mga Chinese vessels. Una noong Hulyo at pangalawa nitong buwan.
Dagdag pa ni Sobejana, bukod sa armado ang Reconnaissance ship ng Chinese Navy, may added capability din ang mga ito para imonitor kung ano ang mga aktibidad na nagaganap sa loob ng maritime domain.
“Ang innocent passage kasi following the sealanes of communictions, straight line, since these are warships their entry to our territory should be coordinated so we informed the national leadership para sa ganun they can engage with their counterparts sa Dept of Foreign Affairs o sa mga attaches diyan sa Manila,” pahayag pa ni Sobejana.
