Target ngayon ng Philippine Accessible Disability Services (PADS) Adaptive Dragonboat Team na makakuha ng podium finish sa International Dragon Boat Regatta 2025 sa Malaysia.
Gaganapin ang kompetisyon mula Nobyembre 28 hanggang 30, na lalahukan ng 54 na koponan mula sa mahigit 11 bansa at rehiyon.
Sa eksklusibong panayam ng Star FM Cebu kay JP Maunes, team leader ng PADS dragonboat team, ibinahagi nito na mahigit tatlong buwan nilang pinaghirapan ang paghahanda, kasama na ang pagpapatibay ng kanilang taktika, boat handling, physical conditioning, at mental endurance—lalo na para sa mga bagong sasabak sa international level.
Binubuo ang delegasyon ng mga atleta mula sa Cebu City, Mandaue City at Lapu-Lapu City kung saan karamihan ay produkto ng kanilang Youth Dragon Boat Program.
Sasabak sila sa iba’t ibang kategorya para sa 250-meter at 400-meter distance race, pati na rin sa dragon boat tug-of-war.
Aminado pa ni Maunes na malaking hamon sa koponan ang pagharap sa mga premier at beteranong teams mula sa iba’t ibang bansa.
Gayunpaman, buo ang kanilang kumpiyansa dahil sanay na silang makipagsabayan sa mga able-bodied teams, bilang natatanging paradragon team ng Pilipinas.
