May nakahanda umanong mga bakuna laban sa anthrax ang Bureau of Animal Industry at may kakayahan din daw itong gumawa ng mga bakuna, ayon kay Department of Agriculture Assistant Secretary for Livestock Dr. Constante Palabrica.
Mayroon din daw na “seed virus” ang Bureau of Animal Industry kaya may kakayahan itong makagawa ng sariling bakuna laban sa Anthrax.
Kaya siniguro ng ahensiya na handa ang Pilipinas sakaling magkaroon ng outbreak nito sa bansa.
Gayunpaman, hinimok ni Palabrica ang mga magsasaka na i-report kaagad sa beterinaryo kung pinaghihinalaan nilang may anthrax infection na ang alagang hayop dahil mayroon naman umanong free testing ang gobyerno rito. Libre din daw ang bakuna ng anthrax dahil ito raw ay subsidized ng budget ng DA.
Kabilang sa mga sintomas ng anthrax sa mga hayop ay lagnat, pagkakaroon ng vesicles, at hindi nito pagkain.
Nagpaalala rin ang opisyal na zoonotic ang anthrax kaya maaari itong maipasa sa tao na lubhang delikado lalo na kung may comorbidity ang taong nahawa.
Dahil dito, hindi raw dapat kainin ang mga hayop na nagpositibo sa Anthrax.
Sa ngayon ay wala pang outbreak ng Anthrax sa Pilipinas. Mayroon namang na-monitor ang DA na Anthrax sa Northern Luzon ilang buwan na ang nakalilipas pero under control na raw ang sitwasyon at nakapagpadala na rin ng bakuna sa mga apektadong lugar.
