Mas lalo lamang daw napasama ang Anti-Terrorism Act dahil sa inilabas na implementing rules and regulations (IRR) ng Department of Justice (DOJ).
Ito’y matapos ang sunod-sunod na puna na natanggap ng ahensya dahil sa umano’y isiningit na probisyon sa IRR ng naturang batas.
Ayon kay Edre Olalia, isa sa mga naghain ng petisyon sa Supreme Court hinggil sa legalidad ng ATA at presidente ng National Union of Peoples’ Lawyers, mas lalo lamang daw lumabo ang kontrobersiyal na batas dahil sa IRR.
Isiningit aniya sa IRR ang creative, artistic, at cultural expression sa listahan ng pwedeng ituring na act of terrorism, bukod pa ito kung ang pakay ng isang terorista ay pumatay, manakit at lumikha ng panganib sa publiko.
Sa henerasyon daw kasi na mayroon ngayon, kadalasan ay dinadaan sa kantam sayaw o iba pang uri ng pagtatanghal ang mga kilos-protesta.
Napansin din nito ang probisyon kung saan nakasaad ang pag-uudyok sa paggawa ng terorismo. Kahit kasi hindi sumali sa paggawa ng terorismo ay maaari pa ring parusahan sa ilalim ng batas ang speeches, proclamations, writings, paggawa ng banners at iba pa na humihikayat na gawin ito.
Base sa IRR, gagamit ito ng “reasonable probability of success test” upang himayin ang kontekstp, katayuan ng nagsasalita, intensyon, laman at maging ang paraan ng pagkakasabi.
Kasama rin dito ang posibilidad na may kaugnayan ang pahayag sa incitement o panunudyok.
Dagdag pa ni Olalia, ngayon lamang niya narinig ang sinasabing reasonable probability sa IRR. Naglagay aniya ang justice department ng pamantayan na wala naman sa batas o jurisprudence.
Paliwanag naman ni SC spokespersdon Theodore Te, wala pang malinaw na kahulugan ang reasonable probability of success test sa batas, maging ang dating mga kasong nadesisyunan ng Korte Suprema.
