Maaaring bumagsak sa critical level ang antas ng tubig sa Angat Dam sa pagtatapos ng buwan ng Hunyo.
Ito ang pagtaya ni Jofren Habaluyas, hydrologist ng Department of Science and Technology (DOST), dahil sa araw-araw na pagbaba ng antas ng tubig ng halos kalahating metro.
Nitong umaga, Hunyo 25, naitala ang water level ng Angat Dam sa 162.98 meters, na mas mababa kumpara sa normal na antas na higit 180 meters.
Ayon kay Habaluyas, tila hindi bumabagsak sa catchment area ng mga dam ang mga pag-ulan kaya’t hindi nakakatulong sa pagtaas ng water level.
Ang Angat Dam ang pangunahing pinagkukunan ng tubig para sa Metro Manila at kalapit na mga probinsya. Kapag bumagsak ito sa critical level na 160 meters, maaapektuhan ang suplay ng tubig sa mga kabahayan, irigasyon sa mga sakahan, at maging ang power generation.
Patuloy na mino-monitor ng mga ahensya ng gobyerno ang sitwasyon at nananawagan sa publiko na magtipid sa paggamit ng tubig habang inaasahan ang pagdating ng mas malalakas na pag-ulan sa mga susunod na linggo.
