Binigyang diin ng Department of Finance (DOF) na ang gobyerno ay naglaan ng 12.1% o P699.2 bilyon ng panukalang P5.768 trilyon na pambansang budget sa susunod na taon para tustusan ang pagbabayad ng mga obligasyon o utang.
Sinabi ni Finance Secretary Benjamin E. Diokno, kapag ina-assess ang bahagi ng burden component ng budget, mahalagang isaalang-alang lamang ang mga pagbabayad ng interes at net lending.
Ang net lending ay tumutukoy sa mga advance ng pambansang pamahalaan para sa pagbabayad ng utang.
Sinabi ni Diokno na ang mga interest payments (IP) ay bumababa rin.
Nanindigan din ang pinuno ng pananalapi na sa ilalim ng anumang pamantayan ng accounting, ang pangunahing amortisasyon ng utang ay hindi kasama sa expense item dahil hindi ito nauuri bilang expenditure, kaya hindi ito awtomatikong inilalaan.
Idinagdag niya na dahil ito ay umiiral nang obligasyon, ang principal amortization ay hindi nagreresulta sa anumang karagdagang utang.
Sinabi ni Diokno na ang economic team ng administrasyong Marcos ay nananatiling nakatuon sa pagpapatupad ng Medium-Term Fiscal Framework (MTFF), na nagsisilbing blueprint ng gobyerno para sa pagbaba ng debt-to-GDP ratio ng bansa mula sa 60.9% noong 2022 at sa mas mababa sa 60 % pagsapit ng 2025, pagbabawas ng deficit-to-GDP ratio sa 3% sa 2028, at pagpapanatili ng paggasta sa imprastraktura sa 5% hanggang 6% ng GDP.
