NAGA CITY – Sugatan ang dalawang lalaki matapos na pagtatagain ng isang lalaki sa Lucena City.
Kinilala ang mga biktima na sina Rix Afaril Embutin, 49-anyos, at Samuel James Jadion Embutin, 21-anyos, residentes ng Purok 7, Labasan, Brgy. Dalahican sa nasabing lungsod.
Sa nakalap na impormasyon ng Bombo Radyo Naga sa Quezon Police Provincial Office, napag-alaman na habang nag-iinuman ang mga biktima kasama ang suspek na kinilalang si Abner Mendoza Cabangon, 51-anyos, residente rin ng nasabing lugar ng magkaroon ng hindi pagkakaindihan sa pagitan ng mga ito.
Kaugnay nito, ng makita ng suspek si Samuel na mayroong hawak na bote, agad nitong kinuha ang kaniyang itak at pinagtataga ang biktima.
Sa inisyal na imbestigasyon ng mga awtoridad, napag-alaman na nagtamo ng sugat sa iba’t-ibang bahagi ng kanilang katawan ang mga biktima na agad namang dinala sa pagamutan.
Sa ngayon, nasa kustodiya na ng mga awtoridad ang suspek habang nagpapatuloy an isinasagawang imbestigasyon ng mga awtoridad.
