Nasa 12,000 katao ang dumalo sa “Tama na March Rally: Kontra Korapsyon, Kontra Baha” ngayong araw sa Bacolod City.
Sa panayam ng Bombo Radyo Bacolod kay dating Negros Occidental Governor Rafael “Lito” Coscolluela, tagapagsalita ng Taong Bayan Ayaw sa Magnanakaw at Abusado Network Alliance (TAMA NA)-Negros, sinabi niyang ilang araw nilang pinaghandaan ang rally at sisikapin nilang maging organisado upang maiwasan ang anumang kaguluhan.
Ayon sa kanya, tinatayang aabot sa 12,000 ang makikisali dahil sa pakikiisa ng iba’t ibang parokya ng Simbahang Katoliko.
Dagdag pa ni Coscolluela, ang grupo mula sa Northern Negros Occidental ay magsasama-sama sa Brgy. Bata, Bacolod City at magsasagawa ng caravan patungo sa Capitol Lagoon.
Samantala, ang grupo mula sa Southern Negros Occidental ay magkikita-kita sa Araneta Street at magsasagawa ng caravan hanggang sa Lupit Church.
Ang lahat ng kalahok ay magtitipon sa harapan ng Replica sa Bacolod City Public Plaza.
Nanawagan si Coscolluela sa pamahalaan na tigilan na ang korapsyon at panagutin ang sinumang may sala.
