Nilinaw ni House Committee On Justice at Batangas Rep. Gerville Luistro na wala sa mga alituntunin ng Kamara ang pagpapahintulot sa mga abogado ni Vice President Sara Duterte na lumahok sa impeachment hearings.
Sinabi ni Luistro na tanging mga miyembro ng Justice Committee lamang ang magdedesisyon at magde-deliberate sa apat na reklamo laban sa bise presidente. Anumang hiling mula sa kanyang mga abogado ay nakasalalay sa kolektibong pasya ng panel.
Idinagdag niya na ang pagdalo ni Duterte sa pagdinig ay karapatan niya, ngunit opsyonal.
Tungkol naman sa hiling na subpoena sa bank records ni Duterte at ng kanyang pamilya, sinabi ni Luistro na susuriin muna ng panel kung pasado ang reklamo sa “sufficiency in form and substance” bago magpatuloy sa iba pang hakbang.
Ang ikaapat na impeachment complaint ay nakasentro sa umano’y hindi ganap na pagdeklara ng assets ni Duterte sa SALNs at posibleng hindi ipinalinaw na yaman na hindi akma sa kanyang lehitimong kita.
Ito ay inihain ni Atty. Nathaniel G. Cabrera at sinuportahan nina House Committee on Human Rights Chair at Manila Rep. Benny Abante at Deputy Speaker Paolo Ortega.
Ang reklamo ay nag-aakusa sa bise presidente ng paglabag sa Konstitusyon, pagtaksil sa tiwala ng publiko, graft at korapsyon, bribery, at iba pang mataas na krimen.
