Nagpahayag ng pagkadismaya si Senador Jinggoy Ejercito Estrada kaugnay ng resolusyon ng Department of Justice (DOJ) hinggil sa mga kasong inihain laban sa kanya.
Ayon sa senador, ito ay isang “hindi kanais-nais na pangyayari” at tinawag niyang hindi makatarungan, lalo’t malinaw na sinabi ng Senate Legislative Budget Research and Monitoring Office (LBRMO) na walang rekord na siya ay nagpasok ng anumang insertions sa pambansang badyet para sa 2025.
Binanggit din ni Estrada na mismong si Senador Panfilo Lacson, chairperson ng Blue Ribbon Committee, ay kumilala sa naturang impormasyon bilang mahalagang bahagi sa mga isyung ibinabato laban sa kanya.
Dahil dito, noong Mayo 15 ay naghain siya ng omnibus motion sa DOJ upang muling buksan ang preliminary investigation sa mga kasong inihain ng National Bureau of Investigation (NBI) kaugnay ng flood control projects. Layunin ng mosyon na maisama at mapag-aralan ang karagdagang ebidensya na makatutulong sa patas at obhetibong pagdedesisyon sa mga reklamo.
Giit ng senador, hinihingi ng due process at katarungan na isaalang-alang ang lahat ng kaugnay na ebidensya at opisyal na findings bago maglabas ng konklusyon.
Gayunman, tiniyak niyang mananatili siyang nakatuon sa pagharap sa mga alegasyon sa pamamagitan ng tamang legal na proseso, at naniniwala siyang sa huli ay mananaig ang katotohanan na suportado ng mga opisyal na rekord.
