Pinalagan ni Senator Christopher “Bong” Go ang akusasyon laban sa kaniya ng Office of the Prosecutor ng International Criminal Court (ICC) kung saan pinangalanan siya bilang co-perpetrator o kasabwat ni dating Pangulong Rodrigo Duterte sa kasong crimes against humanity may kaugnayan sa madugong war on drugs.
Sa inilabas na statement ng Senador ngayong gabi ng Sabado, Pebrero 14, sinabi niyang ngayon lamang niya nalaman ang hinggil sa mga alegasyon na ibinabato laban sa kaniya na nakasaad sa redacted version ng Document Containing the Charges na inisyu ng ICC mula sa Office of the Prosecutor kahapon, Pebrero 13.
Mariing itinanggi ng Senador ang mga alegasyon bilang ganap na walang batayan, may pinapanigan, hindi patas at walang kinalaman sa kaniyang naging papel at responsibilidad noong nagsilbi siya bilang Special Assistant ni dating Pangulong Duterte mula Hunyo 2016 hanggang Oktubre 2018 gayundin bilang Executive Assistant to the Mayor ng Davao City mula 1998 hanggang 2016.
“Let me be clear, at no time did I have any involvement in, knowledge of, or authority over these allegations,” giit ng Senador.
Pinabulaanan din ng Senador ang maling akusasyon na nagsilbi siyang Chief of the Presidential Management Staff, dahil hindi kailanman niya hinawakan ang naturang posisyon.
“Throughout my career, I have upheld the highest standards of integrity, transparency, and dedication to the welfare of our people. I will not allow these baseless accusations to distract me from my responsibilities as a duly elected Senator of the Republic. My focus remains steadfastly on serving the Filipino people—particularly the poor and vulnerable,” paliwanag ng Senador.
