Hindi pa rin makapaniwala ang maraming namatay na ang Hollywood director na si Rob Reiner at ang kanyang asawa matapos parehong magtamo ng mga saksak sa katawan.
Ang itinuturong suspek ng mga otoridad ay mismong anak ng mag-asawa.
Inaresto ang 32-anyos na si Nick Reiner ilang oras matapos matagpuan ang labi ng 78-taong gulang na direktor at ng kanyang asawa, si Michele Singer Reiner, sa kanilang bahay sa Brentwood, Los Angeles noong Linggo.
Batay sa inisyal na ulat ng Los Angeles Police, tadtad ng saksak sa katawan ang mag-asawa at may hiwa rin sa leeg na siyang naging sanhi ng kanilang pagkamatay.
Ayon kay Los Angeles Police Chief Jim McDonell, nadakip nila si Nick Reiner ilang oras matapos ang krimen, matapos mag-report ang nakababatang kapatid na babae nang matagpuan ang bangkay ng kanilang mga magulang sa kanilang bahay.
Samantala, pinaghihinalaan ng mga awtoridad na ang dahilan ng pagpaslang ay ang naging sagutan ng mag-anak sa isang Hollywood party. Isa rin sa nakikitang rason ay ang umano’y pagiging abusado ni Nick, na una nang napansin noong kabataan pa lamang niya.
