Sinabi ni Camarines Sur 4th District Rep. Arnie Fuentebella na tila pinalaki lamang ang isyu tungkol sa maling coordinates ng mga Farm-to-Market Road (FMR) projects matapos aminin ng Department of Agriculture (DA) na walo lamang sa kabuuang 1,669 proyekto ang may pagkakamali.
Ayon kay Fuentebella, wala pang isang porsiyento ng mga proyekto ang apektado kaya hindi dapat isipin na mali ang buong programa ng FMR. Giit niya, hindi rin layunin ng Kongreso na manisi kundi tiyaking maayos ang pagpapatupad ng mga proyekto.
Sinabi ni Fuentebella na maaari pang itama ang mga pagkakamali habang nagpapatuloy ang pagtalakay sa badyet sa Senado at bicameral conference committee.
Hinimok din niya ang DA na pagbutihin ang geotagging at pagsusuri ng mga proyekto, lalo na sa mga liblib na lugar na mahina ang signal.
Samantala, nangako ang DA na itatama ang maling impormasyon at palalakasin ang proseso ng beripikasyon upang hindi na maulit ang ganitong pagkakamali.
Binigyang-diin din ng mga mambabatas na mahalaga ang FMR projects sa pagpapababa ng gastos sa transportasyon at pagpapataas ng kita ng mga magsasaka.
