Nanawagan ang Philippine National Police (PNP) sa lahat ng dadalo sa anti-corruption rally mamaya na gamitin nang responsable ang kanilang mga karapatan at makipagtulungan sa mga awtoridad.
Ito aniya ay upang mapanatiling ligtas, mapayapa at maayos ang idaraos na kilos-protesta sa lugar.
Bilang bahagi ng pinaigting na seguridad, tiniyak ng PNP sa publiko na naisagawa na ang lahat ng kinakailangang hakbang upang matiyak ang ligtas, mapayapa, at maayos na pagdaraos ng Trillion Peso March.
Sa kanilang pakikipagtulungan sa Department of the Interior and Local Government (DILG), magdedeploy ang pambansang pulisya ng sapat na kapulisan sa mga kritikal na lugar para mapangasiwaan ang dami ng mga tao, marespondehan ang mga emergency situation at manatili ang daloy ng trapiko.
Dagdag pa ng PNP, bagama’t iginagalang at pinangangalagaan ang karapatan ng publiko na ipahayag ang kanilang saloobin, hindi pahihintulutan ang anumang kilos ng karahasan, pananakot, o anumang gawaing labag sa batas.
Samantala, pansamantala na ring suspendido ang Permit to Carry Firearms Outside of Residence (PTCFOR) sa Metro Manila mula Nobyembre 29 hanggang Disyembre 1, 2025.
Tanging uniformed law enforcement personnel lamang ng papayagang magdala ng baril sa naturang period upang higit pang matiyak ang kaligtasan ng publiko.
