Muling pinagtibay ng Philippine National Police (PNP) ang pangako nitong palakasin ang pagpapatupad ng batas laban sa kalupitan sa mga hayop sa pamamagitan ng mas pinaigting na operasyon ng pulisya, mas malapit na pakikipag-ugnayan sa mga ahensya ng pamahalaan, at mas pinaigting na pagsasanay para sa mga pulis sa buong bansa.
Ang direktiba ay inilabas matapos tanggapin ni PNP Chief, Police General Jose Melencio C. Nartatez Jr., si Dr. Marie Shella G. Ordinario, pinuno ng Animal Welfare Unit ng Bureau of Animal Industry (BAI), sa isang courtesy visit sa Camp BGen Rafael T. Crame noong Hulyo 28.
Tinalakay sa kanilang pagpupulong ang pagpapalawak ng ugnayan ng PNP at BAI sa pagpapatupad ng mga batas para sa kapakanan ng mga hayop. Nagkasundo ang dalawang ahensya na palakasin ang koordinasyon sa operasyon, magbigay ng teknikal na suporta, at magsagawa ng orientation seminar upang higit pang mapahusay ang kakayahan ng mga pulis sa paghawak ng mga kasong may kaugnayan sa animal welfare.
Ang Bureau of Animal Industry ang pangunahing ahensya ng pamahalaan na nangangasiwa sa pagpapatupad ng mga polisiya at programa para sa kapakanan ng mga hayop.
Ayon kay PGEN Nartatez, suportado ng PNP ang pagpapatupad ng Animal Welfare Act sa pamamagitan ng pag-iimbestiga sa mga reklamo at pagtulong sa mga operasyon ng pagpapatupad ng batas laban sa mga lumalabag.
Inatasan din ang mga yunit ng pulisya na paigtingin ang pangangalap ng impormasyon at mga operasyon laban sa organisadong kalupitan sa mga hayop, ilegal na kalakalan ng karne ng aso, at iba pang paglabag sa umiiral na mga batas sa animal welfare.
Sinabi ni PGEN Nartatez na ang pinalakas na ugnayan ng PNP at BAI ay sumusuporta sa Focused Agenda ng PNP sa pamamagitan ng pagpapatibay ng pakikipagtulungan sa komunidad at pagpapahusay ng operasyon ng pulisya sa pakikipag-ugnayan sa iba pang ahensya ng pamahalaan.
Alinsunod ito sa direktiba ni Pangulong Ferdinand “Bongbong” R. Marcos Jr., sa paggabay ni DILG Secretary Jonvic Remulla, na tiyakin ang epektibong pagpapatupad ng mga batas na nagpoprotekta sa kapakanan ng mga komunidad at ng mga hayop.
“Acts of cruelty against animals can be an indicator of broader unlawful behavior. This is why we are strengthening our capability to investigate these cases and respond promptly in coordination with the Bureau of Animal Industry and other stakeholders,” paliwanag ni PGEN Nartatez.
Nanawagan din siya sa publiko na makiisa sa pangangalaga sa mga hayop sa pamamagitan ng agarang pag-uulat sa mga awtoridad ng anumang insidente ng pang-aabuso at pagpapabaya sa mga ito.
