Sinuspendi ang Permits to carry firearms outside of residence (PTCFORs) sa Metro Manila dahil sa nakatakdang malawakang protesta kontra korapsiyon bukas, Nobiyembre 30.
Epektibo ito mula kaninang alas-12:01 ng madaling araw, Sabado, Nobiyembre 29 hanggang sa alas-11:59 ng gabi sa araw ng Lunes, Disyembre 1.
Ayon sa Philippine National Police, tanging papayagan lamang na magbitbit ng mga baril ay ang kanilang mga miyembro kasama ang Armed Forces of the Philippines at iba pang law enforcement agencies na nasa official duties at sa agency-prescribed uniforms.
Samantala, inaasahan ng kapulisan ang malaking bilang ng mga taong lalahok sa malawakang rally.
Kaugnay nito, nasa 15,000 kapulisan ang ipapakalat ng PNP at naghahanda rin sila sa posibleng infiltration attempts ng mga grupong magtatangkang manggulo, kapareho nang nangyari noong September 21 rally sa Maynila.
Sa ngayon, walang anumang banta ang na-detect ng PNP, bagamat naka-pokus ang kanilang intelligence monitoring sa potential agitators. Tiniyak din ang maigting na pakikipagugnayan sa ibang mga ahensiya para mapigilan ang anumang mga pagtatangkang i-hijack ang mapayapang layunin ng rally.
