CAUAYAN CITY – Sinuspinde ang operasyon ng Out Patient Department (OPD) ng ilang pagamutan sa Isabela dahil sa pagpositibo ng ilan nilang health workers at kawani.
Batay sa inilabas na abiso ng Isabela Provincial Information Office, umabot sa 23 health workers sa tatlong pagamutan sa Isabela ang nagpositibo sa COVID-19.
Pitong health worker na nagtatrabaho sa Echague District Hospital ang nagpositibo sa COVID-19, isang nurse at isang medtect naman sa Milagros Albano District Hospital habang 14 na kawani ng San Mariano Community Hospital naman ang naka-quarantine.
Sa naging panayam ng Bombo Radyo Cauayan kay Atty. Elizabeth Binag, tagapagsalita ng pamahalaang panlalawigan ng Isabela, sinabi niya na bagamat may mga naitalang positibo sa mga nabanggit na ospital ay nakaantabay pa rin ang ibang kawani ng mga pagamutan upang magbigay ng serbisyo sa mga mamamayan.
Ilang serbisyong pangmedikal lamang ang sinuspende tulad ng Out Patient Department para sa contact tracing at disinfection.
Sa ngayon ay wala pang petsa kung kelan magbubukas ang OPD ng mga nabanggit na ospital.
