‘Night-shift’ vaccination sa iba’t ibang LGUs sa Metro Manila inilunsad

Sinimulan na kagabi ng iba’t ibang local government units (LGUs) sa Metro Manila ang pagbabakuna sa kanilang mga residente sa gabi.

Paraan na rin ito ng mga LGUs para ma-accommodate ang mga manggagawang hindi magawang makapagpabakuna sa umaga dahil mayroon pa silang pasok sa trabaho o may mga kailangan na asikasuhin.

Sa Quezon City, aabot sa 2,000 pre-registered essential workers o mga kabilang sa A4 priority group ang nabakunahan ngayong gabi sa Quezon City Hall Grounds.

Bukas ang kanilang “Bakuna Nights” mula alas-6:00 ng gabi hanggang alas-10:00 ng gabi.

Ganito rin ang schedule para sa night-shift vaccination sa mga industry workers at economic frontliners sa Valenzuela City, na isinasagawa sa Pasolo Elementary School.