Habang nagpapatuloy pa ang bilangan ng boto para sa US presidential election sa pagitan nina Incumbent President Donald Trump at Democratic Nominee Joe Biden, ay may panibagong usapin na naman na kumalat sa social media.
May kaugnayan ito sa inilabas na video ng anak ng Republican president na si Eric Trump kung saan makikita na sinusunog ang mga balota na para raw sa kaniyang ama.
Makikita sa video ang isang lalaki na nagsasabing sinusunog nito ang nasa 80 balota na para kay Trump.
Kaagad naman itong pinasinungalingan ng mga election officials mula sa Virginia. Anila hindi ito ang mga official na balotang ginagamit sa eleksyon bagkus ay mga sample ballots lamang.
May inilabas pa ang naturang estado na freeze-frame photo kung saan makikita na ang mga balota ay para sa mga botante ng Virginia.
Una nang isiniwalat ni Eric ang di-umano’y harap-harapan daw na dayaan na nagaganap sa bilangan.
