Ibinaba sa magnitude 5.3 ang naitalang lindol sa Calayan, Cagayan kaninang 6:01 ng umaga, ayon sa Philippine Institute of Volcanology and Seismology (PHIVOLCS).
Naitala ang Intensity V sa Calayan, habang Intensity IV naman sa Pasuquin, Pagudpud, at Burgos sa Ilocos Norte.
Sa Laoag City, San Nicolas, Bacarra, at Aparri sa Cagayan ay nakapagtala ng Intensity III, at Intensity II sa Pinili.
Bagama’t walang naitalang pinsala o nasawi, ramdam ang pagyanig sa ilang bahagi ng Hilagang Luzon.
Ang Cagayan Valley ay kilala bilang isa sa mga rehiyon na madalas tamaan ng lindol dahil sa lokasyon nito malapit sa Philippine Fault Zone at iba pang aktibong seismic structures.
Noong nakaraang taon, nakaranas din ang rehiyon ng serye ng moderate earthquakes na nagdulot ng pangamba sa mga residente.
Patuloy na pinapayuhan ng PHIVOLCS ang publiko na manatiling alerto sa mga posibleng aftershocks at tiyakin ang kaligtasan ng bawat pamilya.
Ang mga lokal na pamahalaan ay inaasahang magpapatupad ng monitoring at assessment upang matiyak na ligtas ang mga gusali at imprastruktura.
Sa kasalukuyan, nananatiling normal ang operasyon sa mga pangunahing pasilidad sa Cagayan at Ilocos Norte.
