Humingi ng paumanhin si Foreign Affairs Sec. Teodoro Locsin Jr. sa China at kay Chinese Ambassador to the Philippines Zhao Jianhua matapos na magbiro sa isang tweet hinggil sa pangalan ng Chinese communist revolutionary na si Mao Zedong.

Sa kanyang Twitter account, humingi ng patawad si Locsin makaraang tawagin si Mao Zedong bilang Mao Che Tutong na sa salitang Filipino ay nangangahulugang sunog na kanin na dumidikit sa ibabang bahagi ng kaldero.

“My profound apologies to the People’s Republic of China, the Communist Party responsible for its unprecedented achievements and Amb. Zhao, for using the Great Helmsman’s name in vain,” ani Locsin.

“All this revisionism makes me—as the first defender of “Red China”—forget my admiration,” dagdag pa nito.

Noong Setyembre 30, sumagot si Locsin sa isang tweet na nagsasabi na bukod sa mga panibagong slogans, kailangan na rin ng mga makakaliwang grupo sa Pilipinas na gumawa ng isang platform na angkop sa current setting ng bansa.

Sumang-ayon dito ang kalihim at sinabi na dapat mag-move on na sa mga ideologies ni Mao Zedong na tinawag niyang Mao Che Tutong at sa halip ay tularan ang Marxism bilang isang pilosopiya.