Nilinaw ni Senator Panfilo “Ping” Lacson na hindi siya ang vice chairperson ng Senate Blue Ribbon Committee at hindi pa umano natatapos ang reorganisasyon at pormal na halalan ng mga miyembro ng komite sa Senado.
Ayon kay Lacson, bukas siya maging bahagi ng komite ngunit hindi niya nakikitang katanggap-tanggap na tanggapin ang posisyon bilang vice chair kung ito ay ialok sa kanya.
“Kung mag-member ako, papayag ako. Pero vice, di ako papayag,” ani Lacson.
Giit pa niya, inaasahan din na hindi umano ito magiging pabor para sa mga miyembro ng kasalukuyang mayorya, lalo na’t wala umanong lumagda mula sa kanila sa naunang partial committee report ng Blue Ribbon.
Inamin din ng beteranong senador na mas pinipili niyang gampanan lamang ang kanyang tungkulin kahit pa humantong ito sa batikos o pagkakaroon ng bagong kalaban sa pulitika.
“Pag nag-chair ka ng Blue Ribbon, nakahanda ka dapat magkaroon ng bagong kaaway at mawalan ng kaibigan,” dagdag niya.
Pinabulaanan din ni Lacson ang mga paratang na pinoprotektahan umano niya si dating House Speaker Martin Romualdez kaugnay ng mga alegasyon sa flood control scam, at iginiit na wala siyang personal na koneksyon dito.
Sa kasalukuyan ang naitalaga si Senator Pia Cayetano na bagong Chairperson ng Blue Ribbon Committee ngunit wala pang opisyal na pahayag ang senadora ukol sa mga susunod na hakbang hinggil sa imbestigayon ng flood control scam.
Samantala, sa gitna ng mga isyung bumabalot sa Senado, nagpahayag din siya ng pagkadismaya sa patuloy na kontrobersiya habang naghahanda ang kapulungan bilang impeachment court para kay Vice President Sara Duterte.
“Nakakalungkot talaga,” ani Lacson, sabay giit na dapat maibalik ang kredibilidad at integridad ng Senado sa mata ng publiko.
Binigyang-diin niya na layunin ng minorya na maibalik ang tiwala ng publiko sa institusyon at sa tinawag niyang “Senate of old.”
