Eksakto isang linggo matapos magkaroon ng “second life,” napabalik-tanaw si Kim Chiu sa pagkakaligtas nito sa kinasangkutang ambush sa bahagi ng Quezon City.
Sa kanyang online post matapos ang ilang araw na pananahimik, bakas na tila ngayon pa lamang nagsi-sink sa 29-year-old actress na buhay pa rin sila ng kanyang driver at assistant.
Ayon sa Chinese-Filipina actress na tubong Cebu, napagtanto nito na talagang maiksi lamang ang buhay kaya masasabi niyang isang himala na siya ay nakaligtas.
Mas papahalagahan rin daw nito ang buhay lalo’t naramdaman niya ang presensiya ng Diyos na siyang nagbigay ng proteksyon upang walang masawi sa insidente na una nitong pinaniwalaan bilang “mistaken identity.”
Sa ngayon aniya ay ayaw nitong may mamuong pagkamuhi at galit sa kanyang puso, kaya tuloy ang buhay lalo’t wala siyang natatapakan na sino man.
Sa panig naman ng celebrity boyfriend nitong si Xian Lim, hindi na nasundan pa ang mensahe nito patungkol sa insidente.
Pero una nang nag-post ang 30-year-old actor ng black square at inihayag na walang sino man ang makakapagpaliwanag kung bakit may mga katakot-takot na sitwasyon ang biglang nangyayari.
