Kinumpirma ni House Secretary General Atty. Cheloy Velicaria-Garafil na pormal nang nai-transmit kahapon ng hapon, ang dalawang reklamo ng impeachment na inihain laban kay VP Sara Duterte sa Tanggapan ni Speaker Faustino “Bojie” G. Dy III para sa nararapat na aksyon.
Binigyang-diin ni Garafil na ang kanilang tanggapan ay gumaganap lamang ng ministeryal at administratibong tungkulin, na ginagabayan ng Konstitusyon, ng mga patakaran ng Kamara, at ng matagal nang umiiral na protocol.
Ang unang beripikadong reklamo ng impeachment laban kay Vice President Duterte ay inihain ng mga miyembro ng Makabayan Coalition at inendorso nina Party-list Representatives Antonio Tinio ng Alliance of Concerned Teachers (ACT), Sarah Jane Elago ng Gabriela Women’s Party, at Renee Louise Co ng Kabataan.
Samantala, ang ikalawang reklamo ng impeachment ay inendorso nina Party-list Representatives Leila de Lima ng Mamamayang Liberal at Perci Cendaña ng Akbayan. Ang naturang reklamo ay inihain ng mga kinatawan ng iba’t ibang progresibong organisasyon at grupo ng civil society.
