Nakapagtala ang Bureau of Immigration (BI) ng humigit-kumulang 10% o kabuuang 33,000 na pagtaas sa mga paparating at papaalis na pasahero, kasunod ng paglilipat ng mga flight sa Ninoy Aquino International Airport (NAIA).
Ayon kay BI Commissioner Norman Tansingco, ang kanilang NAIA Terminal 3 operations ay nakapagtala ng araw-araw na pag-alis ng halos 17,000 pasahero, at araw-araw na arrivals ng humigit-kumulang 16,000 pasahero.
Ang kanilang mga operasyon ay nakakita ng pinakamalaking pagtaas na may higit sa 1,100 paalis na mga pasahero at 1,500 na paparating na mga pasahero.
Nauna nang iniulat ni Tansingco ang paglalagay ng halos 150 bagong immigration officers sa iba’t ibang international airports.
Inaasahan din nilang maglilipat ng karagdagang 59 na opisyal mula sa kanilang operasyon sa Terminal 2.
Sa kasalukuyan, ang operasyon ng BI Terminal3 ay mayroong 26 na counter at limang e-gate sa arrival area nito at 30 counter sa departure area.
Ibinunyag ni Tansingco na ang pamunuan ng paliparan ay may ibinahaging plano na magbukas ng hiwalay na departure area para sa mga overseas Filipino workers, diplomats, at mga pasahero na nangangailangan ng espesyal na tulong mula sa mga empleyado ng naturang paliparan.
