Iminungkahi ng Office of the Presidential Adviser on Muslim Affairs sa Bureau of Corrections (BuCor) na magkaroon ng hiwalay na pasilidad ng kulungan para sa mga Muslim inmate.
Inihayag ni Presidential Adviser on Muslim Affairs Almarim Tillah ang panukala kay BuCor director Gregorio Catapang Jr. dahil sa hirap na dinaranas ng mga Muslim inmates.
Ayon kay Tillah, ang inisyatiba ay makatutulong na mapanatili ang kulturang Muslim at maprotektahan ang mga bilanggo na mapigilan ang karahasan at tunggalian.
Nabanggit din niya na ang mga Muslim ay may makabuluhang mga kasanayan na dapat sundin, tulad ng pagdarasal ng limang beses araw-araw, pagkain ng mga halal na pagkain at pag-aayuno sa loob ng isang buwan na may iba’t ibang oras ng pagkain sa panahon ng Ramadan.
Tiniyak ni Catapang kay Tillah na tatalakayin niya ang panukala kay Justice Secretary Jesus Crispin Remulla.
Tiniyak din ni Catapang na ang mga preso sa ilalim ng BuCor ay pinapayagang magsagawa ng kanilang pananampalataya sa mga penal facility.
