Isinusulong ni Cagayan De Oro City Representative Lordan Suan sa Kamara ang panukalang batas na layong pagkalooban ng “heartbreak leave” ang mga kawaning nasawi sa pag-ibig.
Sa panukalang House Bill 9931 o ang Heartbreak Recovery and Resilience Act, bibigyan ng magkakaibang leave periods ang mga empleyado base sa edad bilang pagkilala sa kanya-kanyang pangangailangan at sirkumstanya.
Para sa mga manggagawang 25 years old pababa, isang araw ang ibibigay na unpaid heartbreak leave kada taon habang hanggang tatlong araw sa mga kawani na 36 years old pataas.
Para maging kwalipikado sa heartbreak leave, ang mga empleyado ay dapat magpasa ng pirmadong statement na kumukumpirma na galing sila sa breakup sa nakalipas na tatlumpung araw.
Sa pamamagitan nito ay itataguyod ang resource development at support measures sa opisina kung saan pangungunahan ng DOLE at Civil Service Commission ang paglikha ng programa.
Paliwanag ni Suan, tutugunan ng panukala ang mabigat na pinagdadaanan ng mga empleyadong sawi sa pag-ibig na kadalasang nakakaapekto sa performance.
Batay sa mga pag-aaral, ang epekto aniya sa mental well-being ng isang indibidwal na nakaranas ng breakup ay maaaring mauwi sa mas mababang productivity sa trabaho, laging absent at may emotional distress.
