Nagbabala ang farmers’ group Federation of Free Farmers na maaaring lumala pa ang krisis sa bigas sa 2024 sa gitna ng patuloy na pagtaas ng presyo ng mga butil sa kabila ng panahon ng pag-aani.
Ayon kay farmers’ group Federation of Free Farmers (FFF) national chairman na si Raul Montemayor, nakapag-import na ang kanilang grupo ng marami sa unang kalahati ng 2023 bago tumaas ang mga international price at bumaba ang mga pag-import.
Matatandaan na napilitan si Pangulong Marcos na ipatupad ang Executive Order (EO) 39 noong Setyembre 5 na nagpapataw ng price cap na P43 at P45 kada kilo sa regular at well-milled na bigas sa gitna ng mataas na retail price ng staple.
Itinaas ni Marcos ang price ceiling noong Oktubre 4, wala pang isang buwan matapos ang pagpataw ng EO habang nagsimula ang peak harvest season.
Idinagdag ni Montemayor na kung magpapatuloy ang mataas na presyo sa internatiomal market sa 2024, inaasahan ng bansa na mas mababa ang pag-import kaysa sa taon 2023.
Ayon kay Montemayor, muling makararanas ng paninikip ng suplay ang bansa sa bandang Pebrero at Marso bago ang anihan ng tagtuyot at sa Hulyo hanggang Setyembre ng susunod na taon.
Sinabi ni Montemayor na nabigo ang Philippine Statistics Authority na tugunan ang limang milyong metrikong toneladang pagkakaiba sa produksyon ng palay noong nakaraang taon.
Aniya, sa kabila ng peak season harvest ng palay simula Oktubre, nagkaroon ng pataas na trend ang retail price ng bigas.
Ayon sa kanya, naging uso noon ang pagbaba ng presyo ng tingi ng bigas sa panahon ng pag-aani ng palay ngunit hindi umano ito nangyari sa pagkakataong ito.
Una nang sinabi ni Montemayor na higit na maaapektuhan ng El Niño phenomenon ang inaasahang pag-aani sa panahon ng dry season cropping sa susunod na taon. (Reports from Bombo Allaiza Eclarinal)
