Ipinarerekonsidera ni dating Health Secretary at kasalukuyang Iloilo Rep. Janette Garin sa Food and Drugs Administration (FDA) ang emergency use authority (EUA) na iginawad para sa Sinovac COVID-19 vaccines.
Ayon kay Garin, sapat ang lampas 50 percent efficacy rate ng Sinovac COVID-19 vaccines para bigyan ng proteksyon ang mga healthcare workers ang mga nakatatanda kontra sa nakakamatay na respiratory disease.
Sinabi ni Garin na mali ang interpretasyon ng FDA sa mga datos patungkol sa bisa ng Sinovac, na dumaan sa matindi at masusing pagsusuri bago pinayagan gamitin ng nasa anim hanggang pitong bansa na itinurok sa halos 30 milyon katao.
Ang nangyayari aniya sa naging desisyon ng FDA ay ipinagkakait nito sa mga healthcare workers at sa mga nakatatanda ang proteksyon laban sa COVID-19.
Binigyan diin ng kongresista na ang bakuna ay ligtas gamitin at hindi dapat ginagawang batayan sa pagsusuri sa bisa nito ang bansa na pinanggalingan ng mga ito.
Dapat ay makinig din aniya ang FDA sa mga sinasabi ng World Health Organization (WHO) accredited regulatory authorities dahil ang mga ito ay may sapat na kakayanan para makalikom ng kinakailagan na impormasyon at datos patungkol sa COVID-19 vaccines.
Kaugnay nito, hinikayat ni Garin ang Department of Health na magsalita patungkol sa usapin na ito.
Kasabay naman nito ay sinabihan ng kongresista ang mga hindi eksperto pero nakikisawsaw sa issue at nagpapakalat ng maling mga impormasyon na kung maari ay manahimik na lamang.
