Mariing itinanggi ng Food and Drug Administration (FDA) na pwedeng ibenta sa publiko ang mga nasa antas pa lang ng clinical trial o pag-aaral na bakuna ng COVID-19.
Pahayag ito ng ahensya matapos lumabas ang ulat ukol sa ilang bakuna na ibinebenta kahit wala pang ebidensya na ligtas at epektibo ito sa tao.
Iginiit ni FDA director general Eric Domingo na dapat dumaan sa approval ng Vaccine Expert Panel, Ethics Board at kanilang ahensya ang aplikasyon sa registration ng isang bakuna o gamot.
Magagawa lang ito kapag matagumpay na ring naisagawa ang clinical trial ng bakuna sa tao.
“Kahit ano pong gamot sa Pilipinas, they have to be registered with FDA. Even the government cannot buy a vaccine that is not approved by FDA.”
Ayon kay Domingo, walang maipapangako na kaligtasan ang manufacturers sa isang investigational product. Hindi pa raw kasi tiyak ang epekto nito kung hindi pa naman tapos ang pag-aaral na ginagawa.
“Investigational product pa lang ito, in-eksperimento. Kaya nga tayo nagki-clinical trial kasi pinag-aaralan pa lang natin kung safe at effective ang vaccine.”
Dagdag pa ng opisyal, hindi maaaring i-test market o pilot sell ang bakuna.
Nilinaw din ni Domingo na pwede silang mag-rehistro ng bakuna o gamot kahit hindi ito ginawan ng clinical trial sa Pilipinas. Basta’t masisiguro na maganda ang resulta ng trials nito sa ibang bansa.
