Nakatakdang magbukas ang Department of Social Welfare and Development (DSWD) ng mga bagong satellite offices sa Metro Manila para sa Assistance to Individuals in Crisis Situation (AICS) program nito.
Ayon kay DSWD Assistant Secretary Uly Aguilar, ang dalawang karagdagang opisina ay matatagpuan sa Manila at Parañaque City at magiging operational ngayong araw,Abril 27.
Aniya ang inisyatiba na ito ay isang paraan upang mabawasan ang umiiral na Assistance to Individuals in Crisis Situation o AICS payout areas at maghatid ng mga serbisyo nang direkta sa mga kliyente mula sa iba’t ibang bahagi ng Metro Manila at kalapit na mga lalawigan.
Dagdag ni Aguilar, ang mga bagong site ay tutugon sa mga kliyente mula sa hilaga at timog na bahagi ng rehiyon ng kabisera.
Ipoproseso ng CAMANAVA Satellite Office sa Maynila ang mga kahilingan para sa tulong ng mga kliyente mula sa Caloocan, Malabon, Navotas, at Valenzuela City, habang ang Baclaran Satellite Office sa Parañaque City ay tutulong sa mga residente mula sa mga lungsod ng Pasay, Parañaque, Muntinlupa, at Las Piñas .
Dagdag pa dito, sinabi ng DSWD na plano nitong magkaroon ng Assistance to Individuals in Crisis Situation processing areas sa Pasig City at Bulacan sa susunod na buwan.
