Nagsasagawa ng masusing pagsusuri ang Department of Interior and Local Government (DILG) sa pagsunod ng mga local government units (LGUs) sa pinaigting na pagpapatupad ng child-friendly programs sa kani-kanilang lugar.
Pinaalalahanan ni DILG Sec. Benhur Abalos ang mga lokal na opisyal na magiging mahigpit ang departamento sa pagtiyak na masusunod ang mga programa at hakbang sa pamamagitan ng 2022 Child-Friendly Local Governance Audit (CFLGA).
Sa pamamagitan ng CFLGA, tinitiyak ng mga LGU na tutulong ito sa pagbuo ng isang maprotektahang lipunan kung saan matatamasa ng mga bata ang kanilang mga karapatan sa pamamagitan ng pagsasama sa kanila sa kanilang mga plano, badyet, patakaran, at serbisyo.
Nagsimula noong 2014, ang programa ay isang taunang assessment ng pagganap ng mga lungsod at munisipalidad sa pagpapatupad ng mga patakaran, programa, proyekto, at child-friendly policies.
Ipinaliwanag ni Abalos na ang mga LGU ay susuriin batay sa isang hanay ng mga pamantayan, kabilang ang mga child-friendly na pasilidad sa barangay; badyet na inilaan at ginamit para sa mga programang pambata; functional local councils for the protection of children (LCPC) na may representasyon ng bata; at partisipasyon ng mga bata sa pagbuo ng mga programa, proyekto at aktibidad.
