Pinabulaanan ni Interior Secretary Jonvic Remulla ang alegasyon ng mga nagpoprotesta na nagkaroon ng “overkill” sa seguridad sa idinaos na Trillion Peso March lalo na sa Mendiola malapit sa Malacañang kung saan hinarang ang mga demonstrador upang hindi na makalapit pa.
Paliwanag ng kalihim, walang overreaction, ang meron lang ay under reaction. Overreaction aniya kung nagkakasakitan na.
Giit pa niya, ang paglalagay ng maraming tauhan ay bahagi lamang ng pagtiyak ng kaayusan at kaligtasan ng lahat.
Itinanggi rin ni Sec. Remulla na siya ay na-insulto sa mga panawagang magbitiw siya at si Pangulong Ferdinand Marcos Jr.
Aniya, kaya niyang tanggapin ito at wala siyang ego na poprotektahan dahil may karapatan ang lahat na marinig. Hindi man umano siya sang-ayon sa kanila, karapatan umano nilang magsalita.
Una rito, libo-libong Pilipino ang nagtipon sa People Power Monument sa Quezon City para sa Trillion Peso March, habang may iba pang grupo na nagdaos ng protesta sa Rizal Park at Recto Avenue sa Maynila.
Nananawagan ang mga kalahok ng pananagutan sa umano’y korapsyon sa mga flood control project ng pamahalaan.
Ang kilos-protesta ay kakambal na aktibidad ng anti-corruption rallies na unang ginanap noong Setyembre 21.
