Nagsimulang talakayin at harapin ng Department of Agrarian Reform (DAR) at Go Negosyo ang mga benepisyo ng farm clustering sa layuning palakasin ang produktibidad at makatulong na matiyak ang food security para sa Pilipinas.
Inirekomenda ito ng Kapatid Angat Lahat Programa Agri Program (KALAP) at think thank group Foundation for Economic Freedom, na kinatawan ni Dr. Fermin Adriano.
Aniya, ang clustering ay hindi nangangahulugan ng pagsasama-sama ng pagmamay-ari ng lupa ngunit ang pag-cluster lamang ng lupa para sa mas mahusay na pagtatakda ng produksyon.
Idinagdag niya na ang prosesong ito ay humantong na sa mas mataas na produktibidad ng sakahan sa China, Vietnam, Laos, at Cambodia, bukod sa iba pang bansa.
Binanggit ni Adriano na ito ay magbibigay-daan sa pamahalaan na epektibong magbigay ng tulong sa mga magsasaka na naka-cluster.
Sa isang pahayag mula sa Go Negosyo, sinabi nito na ang clustering ay magbibigay-daan din sa paggamit ng mga makabagong makinarya at teknolohiya sa pagsasaka.
Sa pagpupulong, binigyang diin ng dating presidential adviser for entrepreneurship na si Joey Concepcion ang mahalagang papel ng pamahalaan sa inisyatiba ng pribadong sektor na Kapatid Angat Lahat Programa Agri Program na naglalayong magdala ng pag-unlad sa mga magsasakang mga Pilipino.
