Pumalag si Anakalusugan party-list Rep. Mike Defensor sa pagkakatanggal sa kanya bilang chairman ng House committee on public accounts.
Sa isang panayam, sinabi ni Defensor na hindi man lang siya kinausap ni Speaker Lord Allan Velasco patungkol dito.
Nagkaroon pa aniya sila ng maiksing pagpupulong ni Velasco noong nakaraang linggo kung saan kanilang napag-usapan ang mga imbestigasyon na isinasagawa ng Committee on Public Accounts.
Iginiit ni Defensor na hindi naman siya papalag kung sakali mang kinausap siya ni Velasco para bitawan ang hawak na posisyon.
“Civility and leadership dictates that even as we have differences in the past leadership fight, that we treat each other in a respectable manner,” ani Defensor.
Gayunman, sa kabila nang pangyayari, binabati pa rin ni Defensor si Velasco ng maligayang pasko.
“I am comforted by the thought that clear lines have been drawn and in the spirit of the season, I wish Speaker a Merry Christmas. See you next year,” dagdag pa nito.
Kahapon, bago mag-adjourn ang session ng Kongreso, sinibak ni Velasco si Defensor para palitan ni Probinsyano Ako Party-list Rep. Jose “Bonito” Singson, Jr.
Si Defensor ay kilalang kaalyado ni dating Speaker Alan Peter Cayetano.
