Plano ng defense team ni dating Pangulong Rodrigo Duterte na muling iapela ang pagpapalaya sa dating Pangulo.
Ito ay matapos na ibasura ng International Criminal Court (ICC) Appeals Chamber sa pamamagitan ng unanimous decision ang hiling na pansamantalang paglaya ng dating Pangulong nitong Biyernes.
Ayon sa lead counsel ni dating Pangulong Duterte na si Nicholas Kaufman, sa ngayon kanilang inaantay ang resulta ng medical evaluation ni Duterte na nakatakdang ilabas sa Disyembre.
Ang naturang medical evaluation ang susuri sa physical at cognitive condition ng dating Pangulo.
Sinabi din ni Kaufman na hindi na unexpected ang naging hatol ng Appeals Chamber. Aniya, hindi kailanman kinatigan ng ICC Appeals Chamber ang interim release ng isang indibidwal na kinasuhan ng crimes against humanity.
Nanindigan naman ang depensa na hindi na maituturing na “flight risk” ang 80 anyos na dating Pangulo at hindi nagdudulot ng banta sa mga testigo dahil sa kaniyang humihinang kalusugan.
Ayon kay Kaufman, ang mga resulta ng medical evaluation ay magiging bahagi ng kanilang panibagong mosyon para sa interim release.
Binigyang diin din ng depensa na ipagpapatuloy nila ang kanilang pagsisikap para sa pagpapalaya sa dating Pangulo sa kabila pa ng naunang mga pagtanggi dito.
