Nangako ang isang opisyal ng Department of Agriculture na susundin ng kanilang departamento ang direktiba ng Department of Justice.
Ito ay matapos sabihin ni Secretary Jesus Crispin Remulla na sasampahan ng kasong graft and corruption ang ilang opisyal ng ahensya kaugnay sa kontrobersyang kinasasangkutan ng pag-iimbak at pagmamanipula ng presyo sa mga sibuyas noong Disyembre 2022.
Nagbigay ng katiyakan si Agriculture Assistant Secretary at spokesperson Arnel de Mesa na hindi maaapektuhan ang operasyon ng DA sakaling masuspinde ang mga opisyal.
Kabilang sa mga kinilala ni Remulla ay sina DA Assistant Secretary Kristine Evangelista, Bureau of Plant Industry Director Gerald Glenn Panganiban at Agriculture Agribusiness and Marketing Assistance Service officer-in-charge Director Junibert de Sagun.
Iniutos ni Ombudsman Samuel Martires ang anim na buwang preventive suspension kay Evangelista dahil sa umano’y iregularidad sa pagbili ng mga sibuyas na kalaunan ay nabili sa mga tindahan ng Kadiwa.
Sinabi ni De Mesa na maaaring magtalaga ng officer-in-charge si Agriculture Senior Undersecretary Domingo Panganiban upang matiyak na hindi maaapektuhan ang operasyon ng DA sakaling masuspinde ang mga kinauukulang opisyal.
Matatandaang umabot sa P720 kada kilo ang mga retail na presyo ng sibuyas noong Disyembre sa gitna ng pagtatago at pagmamanipula ng mga naturang produkto.
