Muling tiniyak ng Department of Agriculture ang matatag na suplay ng bigas hanggang sa susunod na harvest season sa Marso o Abril 2024.
Ayon kay DA Assistant Secretary Arnel De Mesa, ang bansa ay may matatag na lokal na produksyon ng bigas, na inaasahang aabot sa kabuuang 20 million metric tons bago matapos ang taon.
Nauna nang umangkat ang Pilipinas ng 295,000 MT ng non-basmati white rice mula sa India. Isang paunang 95,000 MT ang nakatakdang dumating ngayong Disyembre, habang ang natitirang import ay inaasahang maihahatid sa Enero.
Maliban diyan, ang bansa ay mayroong 3.03 milyong MT ng imported na bigas, sa pagtatapos ng Nobyembre.
Karaniwan din aniyang dumarating ang mga karagdagang import sa unang quarter ng 2024, ayon kay De Mesa.
Ayon sa pinakahuling monitoring ng DA, ang umiiral na retail price ng well-milled rice ay nasa P51-P52 kada kilo.
