Tumaas pa sa 14.3% ang COVID-19 positivity rate sa Pilipinas o porsyento ng nag popositibo sa virus mula sa mga indibidwal na nasuri ayon sa independent monitoring group na OCTA Research.
Base sa data mula sa Department of Health (DOH), iniulat ni OCTA Research fellow Dr. Guido David Jr. na nakapagtala ang bansa ng 858 na bagong dinapuan ng sakit, 525 ang bagong gumaling at nasa 5,293 aktibong kaso at wala namang nasawi.
Mayroon ding 331 COVID-19 cases ang naitala sa National Capital Region, 55 sa Laguna at 49 sa Cavite.
Sa pagtaya ng OCTA Research group, inaasahang makakapagtala ng nasa 1000 hanggang 1,200 bago kaso ngayong araw ng Sabado, Abril 29.
Samantala, nananatili namang mababa ang naitalang nasawi at hospitalization rate sa Metro Manila na nasa 22%.
Una rito, inirekomenda ng World Health Organization (WHO) na dapat mapanatiling mas mababa sa 5% ang COVID-19 positivity rate upang matiyak na kontrolado ang hawaan ng coronavirus.
