Iminumungkahi ng gobyerno ng China na buhayin ang joint committee meeting sa pagitan ng China Coast Guard at Philippine Coast Guard (PCG) sa ilalim ng kasalukuyang administrasyon ng Pilipinas.
Sinabi ni PCG spokesperson for the West Philippine Sea (WPS) Commodore Jay Tarriela na ang taunang Joint Coast Guard Committee (JCGC) meeting ay sinimulan noong administrasyong Duterte.
Gayunpaman, walang malaking kasunduan ang ginawa sa pagitan ng dalawang partido pagdating sa tensyon sa WPS.
Noong 2017, sa isinagawang pulong ng Joint Coast Guard Committee sa Subic, Zambales, napagkasunduan ng China at Pilipinas na palakasin ang kanilang maritime cooperation sa mga sektor ng pagpigil at paglaban sa drug trafficking at iba pang transnational crime, search and rescue, environment protection at emergency response.
Ang memorandum of understanding para sa mga pagsasanay na ito ay nilagdaan sa Beijing noong Oktubre 2017 at sinaksihan nina dating Pangulong Rodrigo Duterte at Chinese President Xi Jinping.
Nang tanungin kung ano na ang kalagayan ng koordinasyon na ito ngayon, kung isasaalang-alang ang pahayag ni Pangulong Ferdinand “Bongbong” Marcos Jr. na hindi isusuko ng Pilipinas ang isang pulgada ng teritoryo nito, kasama na ang WPS, sinabi ni Tarriela na ang gobyerno ng China ay iminumungkahi ang muling pagbuhay sa joint coast guard committee meeting sa pagitan ng China Coast Guard at ng Philippine Coast Guard.
