Aktibong inisyuhan ng radio challenge at napigilan ng BRP Cabra ng Philippine Coast Guard ang pag-abanse ng China Coast Guard (CCG) 21562 sa karagatan ng Zambales, habang minomonitor din sa radar ang iba pang barko ng China, ang CCG-3305 at CCG-4305.
Sa isang statement, kinumpirma ni PCG spokesperson for the West Philippine Sea Commodore Jay Tarriela ang insidente at tinawag ang presensiya ng mga barko ng China sa lugar bilang ilegal na pagpasok sa karagatang saklaw ng Pilipinas.
Malinaw din itong paglabag sa Philippine Maritime Zones Act, United Nations Convention on the Law of the Sea (UNCLOS), at 2016 Arbitral Award na nagpawalang-bisa sa malawakang maritime claims ng China sa West Philippine Sea.
Subalit, kahit na mas maliit aniya kumpara sa mga barko ng China, matagumpay na napanatili ng BRP Cabra ang distansyang 85 hanggang 100 nautical miles mula sa mga barko ng China at sa panlabas na hangganan ng Exclusive Economic Zone (EEZ) ng Pilipinas.
Sa huli, iginiit ng PCG na hindi nila kukunsintihin ang anumang pagtatangka ng China na baguhin ang status quo sa baybaying bahagi ng Luzon sa pamamagitan ng paglusob o pag-aangkin.
Ang tuloy-tuloy na presensya aniya ng BRP Cabra sa lugar ay patunay ng matibay na paninindigan ng Pilipinas na ipagtanggol ang teritoryo nito sa ilalim ng international law habang isinusulong ang mapayapa at rules-based solution sa sigalot.
