Naging isa sa unang dalawang ahensya ng pamahalaan na na-onboard sa National Single Window–Integrated Trade Facilitation Platform (NSW-ITFP) ang Bureau of Internal Revenue (BIR), na pinangungunahan ng Department of Information and Communications Technology (DICT). Pormal na nagsimula ang pilot go-live operation ng sistema noong Hunyo 19, 2026.
Kasabay ng BIR, na-onboard din ang National Tobacco Administration (NTA). Bahagi ng integrasyon ang Electronic Authority to Release Imported Goods (eATRIG) ng BIR, matapos matagumpay na makumpleto ang User Acceptance Testing (UAT). Ito ay nagbigay-daan sa pilot implementation ng eATRIG sa loob ng National Single Window.
Ayon kay BIR Commissioner Charlito Martin Mendoza, malaking hakbang ito tungo sa mas mabilis at episyenteng transaksyon sa gobyerno.
“Ito ang uri ng whole-of-government digitalization na makatutulong upang maging mas madali at mas episyente ang mga transaksyon para sa mga negosyo,” ani Mendoza.
Dagdag pa niya, alinsunod ito sa direktiba ni Pangulong Ferdinand R. Marcos Jr. na gawing mas simple ang compliance, bawasan ang red tape, at pabilisin ang digital transformation sa ilalim ng Digital and Data Transformation pillar ng BIR DARES Reform Agenda.
Nagpasalamat din si Mendoza sa DICT sa pamumuno sa pagbuo at pagpapatupad ng NSW, sa Department of Finance sa pagbibigay ng gabay sa polisiya, at sa mga technical teams ng BIR na nagsikap para sa proyekto.
“Isa ang eATRIG sa mga prayoridad na digitalization project ng BIR ngayong 2026 dahil sa direktang epekto nito sa importers, manufacturers, logistics providers, at iba pang negosyo sa international trade. Sa pamamagitan ng NSW-ITFP, mapapalitan ang manual ATRIG process ng mas episyente, standardized, at secure na digital workflow,” dagdag pa ng Komisyoner.
Ang NSW-ITFP ay isang centralized digital platform na nagbibigay-daan sa pagsusumite, pagproseso, at pagpapalitan ng trade-related permits at regulatory documents sa pamamagitan ng iisang electronic gateway. Target na ma-onboard ang 72 Trade Regulatory Government Agencies sa iba’t ibang yugto upang mabuo ang isang ganap na integrated digital trade ecosystem para sa bansa.
Kapag mas marami pang ahensya ang maisama, inaasahang makikinabang ang mga negosyo sa mas mabilis na proseso, mas kaunting paulit-ulit na requirements, mas maayos na koordinasyon ng mga tanggapan ng gobyerno, at mas predictable na trade-related transactions.
