CEBU CITY – Kinumpirma ni Barili Vice Mayor at acting Mayor Julito Flores sa Bombo Radyo Cebu na pumanaw na ang kanilang Cebu Province mayor na si Marlon Garcia ngayong araw.
Sa pamamagitan naman ng Facebook ay ipinahayag ni dating Government Service Insurance System president at General Manager Atty. Winston Garcia ang labis na pagkalungkot ng kanilang pamilya ang nangyari.
Noong nakaraang linggo lang kasi nang sumakabilang-buhay din ang kanilang kapatid na si dating Dumanjog Mayor Nelson Garcia.
Inilarawan ni Atty. Winston na totoong “fighter” ang kanyang kapatid na si Mayor Marlon matapos ang pakikipaglaban nito sa kanyang kalusugan sa mga nakaraang araw.
Aniya, mapagmahal na asawa, ama, anak at kaibigan ang alkalde na tapat na naglingkod sa mga nasasakupan nito sa bayan ng Barili.
Hindi naman idinetalye ni Atty. Winston ang dahilan ng pagpanaw ng alkalde.
Si Mayor Garcia ang kapatid ni Cebu Provincial Governor Gwendolyn Garcia na napag-alamang na-infect ng coronavirus noong nakaraang buwan.
Ssinasabing si Mayor Garcia ay ang unang local chief executive sa Cebu na pumanaw matapos ang ilang linggong pakikipaglaban sa coronavirus disease.
