Nangangamba ang mga negosyanteng Chinese-Filipino na maapektuhan ang kanilang mga negosyo at pamumuhunan dulot ng lumalalang tensyon sa pagitan ng Pilipinas at Tsina.
Binalaan ni Victor Lim, presidente ng Federation of Filipino Chinese Chambers of Commerce and Industry Inc. (FFCCCII), ang gobyerno na ang balak na pagpapataw ng sanctions laban kay Chinese Ambassador Jing Quan ay maaaring magdulot ng gantimpalang hakbang mula sa Beijing na lalong magpapalugmok sa ekonomiya.
Isinusulong ngayon ng Senado ang isang resolusyon upang kundenahin ang mga naging pahayag ng embahador hinggil sa kakayahan ng Tsina sa isang military confrontation, habang iginigiit naman ng FFCCCII na hindi ito ang tamang panahon para patawan ng parusa ang diplomat.
Binigyang-diin ni Lim na napakahalaga ng pakikipagkalakalan sa Tsina dahil ito ang pangunahing pinagmumulan ng imports ng bansa na umabot sa mahigit $38.22 billion noong 2025, bukod pa sa pagiging ika-apat sa pinakamalaking export market ng mga produktong Pilipino.
Naaapektuhan na rin sa kasalukuyan ang mga negosyo dahil sa mahinang consumer spending at mataas na presyo ng langis na nagpapahirap sa mga mamamayan na bumili ng iba pang pangunahing bilihin.
Dahil dito, nanawagan ang grupo sa pamahalaan na dumaan sa diyalogo at magpatupad ng restraint upang mapanatili ang magandang investment climate at maiwasan ang tuluyang pag-atras ng mga mamumuhunan sa bansa.
