CAUAYAN CITY-Hindi pa natukoy ang pagkakilanlan ng bangkay ng isang lalaki na natagpuan sa ilog na nasasakupan ng barangay Fugu, Ilagan City.
Sa nakuhang impormasyon ng Bombo Radyo Cauayan, nakatanggap ng tawag mula sa isang concerned citizen ang City of Ilagan Police Station may kaugnayan sa pagkakatagpo sa bangkay na hinihinalang nalunod sa ilog.
Kasama ng mga pulis ang mga kasapi City Disaster Risk Reduction Management Office rescue team na nagtungo sa lugar upang kunin ang bangkay ng lalaki .
Sa panayam ng Bombo Radyo Cauayan kay Police Staff Sgt. John Paul Nicolas ng City of Ilagan Police Station,kanyang sinabi na lumabas sa pauna nilang pagsisiyasat na posibleng naliligo sa ilog ang lalaki nang malunod dahil wala itong suot na damit o saplot ng matagpuan ng mga otoridad.
Ang nasabing lalaki ay may taas na 5’5” hanggang 5’6”, medyo mahaba ang buhok at tinatayang nasa 30 anyos.
Lumabas sa pagsusuri sa bangkay na wala nakitang palatandaan na pinahirapan gayunman may ilang sugat o laceration sa bahagi ng kanyang ulo na posibleng sanhi ng pagkauntog nito sa mga bato at kahoy habang inaanod ng tubig.
Sa pagtaya ng CDRRMO nasa dalawa hanggang tatlong araw na ang nakalipas ng malunod ang lalaki dahil bahagyang lumubo na ang katawan nito.
Nanawagan ng Pulisya sa mga nawawalan ng kamag-anak na makipag-ugnayan sa kanila.
Ang bangkay lalaki ay dinala na sa isang punerarya sa barangay Osmeña, City of Ilagan.
