Mariing kinondena ng mga miyembro ng Makabayan bloc sa Kamara ang pagbibigay ng absolute pardon kay US Marine Corp Lan Corporal Joseph Scott Pemberton na nahatulang guilty sa pagpatay sa transgender woman na si Jennifer Laude.
Sa isang statement, sinabi ni Bayan Muna party-list Rep. Ferdinand Gaite na ang pagbibigay ni Pangulong Rodrigo Duterte ng absolute pardon kay Pemberton ay maituturing na “act of an American lackey” o “tuta ng Kano”.
Panunuya rin aniya ito para sa buong sambayanang Pilipino pati na rin sa dignidad at soberenya ng bansa.
“There is a pending appeal in the court from the family of Jennifer Laude, but this connivance between Malacañang and the United States government ensured that this appeal would not prosper,” ani Gaite.
Lalo lamang aniyang lumulutang ang pekeng nationalism ni Duterte, na siyang hudyat din aniya para huwag nang umasa pa sa pagbasura sa Visiting Forces Agreement.
Para naman kay Gabriela party-list Rep. Arlene Brosas, “treason” kung maituturing ang ginawa ng Pangulo sa pagbibigay ng absolute pardon kay Pemberton.
Hayagan aniyang hindi nirerespeto ni Pangulong Duterte ang justice system gayundin ang pagyurak sa soberyena ng bansa.
“Pardoning such heinous crime is clearly an evidence of betrayal of public trust,” giit ni Brosas.
