Pinangunahan ni Pangulong Ferdinand R. Marcos Jr., kasama ang Department of Energy (DOE), ang opisyal na first gas activation ng Malampaya Phase 4 (MP4) Project sa Malampaya Onshore Gas Plant sa Batangas City, na naglalayong palakasin ang lokal na suplay ng enerhiya.
Opisyal nang pinagana sa ilalim ng MP4 Project ang mga bagong tuklas na balon na Malampaya East-1 at Camago-3, na may tinatayang reserbang 222 bilyong kubiko piye ng natural gas na magpapalawig sa operasyon ng Malampaya field hanggang sa taong 2034.
Malaki ang magiging tulong ng karagdagang suplay na ito sa mga power plant na umaasa sa natural gas para sa Luzon grid, habang binabawasan din ang pag-asa ng bansa sa mga inangkat na panggatong at ang epekto ng pagbabago-bago ng presyo nito sa pandaigdigang pamilihan.
Ayon sa DOE, patuloy ang kanilang dedikasyon sa responsableng pagpapalago ng mga katutubong pinagkukunan ng enerhiya sa bansa sa pamamagitan ng paghikayat ng mga bagong mamumuhunan at pagpapatupad ng mahigpit na pamantayan sa kaligtasan.
Layunin ng hakbang na ito na patatagin ang seguridad sa enerhiya ng bansa, magbigay ng mas maaasahang suplay ng kuryente, at posibleng magbunga ng mas mababang bayarin sa kuryente para sa mga pamilyang Pilipino at mga negosyo.
