Mabilis na nagpadala ng rescue at assistance team ang Philippine Red Cross (PRC) upang tumulong sa patuloy na evacuation at mamahagi ng face masks sa mga apektadong komunidad kasunod ng pagtaas sa Alert Level 3 ng Bulkang Mayon.
Nagsimula na ang paglilikas sa Barangays Anoling at Quirangay sa bayan ng Camalig simula 1:00 ng hapon ngayong Oktubre 30, 2026, habang naghahanda rin ang pamahalaang lokal ng Tabaco sa posibleng paglikas ng kanilang mga mamamayan.
Nilinaw naman ng PRC na wala nang karagdagang pamilya ang kailangang ilikas sa Malilipot dahil nauna nang naisailalim sa relocation ang mga residenteng naninirahan doon.
Muling ipinaalala ni PRC Chairman at CEO Richard J. Gordon sa mga residenteng nasa loob ng 6-kilometer danger zone na seryosohin ang mga evacuation advisories at sundin ang lahat ng utos ng mga lokal na awtoridad.
Pinag-iingat din ng organisasyon ang buong publiko na manatiling alerto, ihanda ang mga mahahalagang gamit, magsuot ng face masks para sa proteksyon laban sa ashfall, at iwasang pumasok sa mga ipinagbabawal na lugar.
Nakatutok pa rin ang PRC sa pagbibigay ng mabilis na tulong sa lalawigan ng Albay alinsunod sa kanilang mandato na maging laging handa sa panahon ng mga sakuna.
